“නීතිය නමන්නේ කවුද?” ඒකාබද්ධ විපක්‍ෂය නම් ලැයිස්තුවක් හදයි!

ඒකාබද්ධ විපක්‍ෂයේ පක්‍ෂ නායකයන්ගේ රැස්වීමක් පසුගිය සතියේ කොළඹ විශේෂ ස්ථානයකදී පැවැත්විණි. හිටපු ජනාධිපති මහින්ද රාජපක්‍ෂ මහතාගේ ප්‍රධානත්වයෙන් පැවැති මෙම රැස්වීමට දිනේෂ් ගුණවර්ධන, විමල් වීරවංශ, මහාචාර්ය තිස්ස විතාරණ, කෙහෙලිය රඹුක්වැල්ල, ජොන්ස්ටන් ප්‍රනාන්දු, වීරකුමාර දිසානායක යන ඒකාබද්ධ විපක්‍ෂයේ නායකයෝ එක්ව සිටියහ.
රට හමුවේ පැන නැඟී ඇති උණුසුම්කාරී වාතාවරණය පිළිබඳවත් ඒ සම්බන්ධයෙන් ගත යුතු ඉදිරි පියවර පිළිබඳවත් එහිදී දීර්ඝ ලෙස සාකච්ඡා විය.
“ගීතා කුමාරසිංහ මන්ත්‍රීතුමියගේ ප්‍රශ්නයේදී කථානායකවරයා කටයුතු කළ ආකාරය වැරදියි” බොහෝ පක්‍ෂ නායකයන්ගේ අදහස විය.
“මේ ආකාරයට කටයුතු කළ කථානායකවරයාට එරෙහිව විශ්වාසභංගයක් රැගෙන එන්න ඕනෙ.” දිනේෂ් ගුණවර්ධන මහතා යෝජනා කළේය.
“රජයේ නීතිපති දෙපාර්තමේන්තුව අද ක්‍රියා කරන ආකාරය ඉතාමත් කනගාටුදායකයි. නීතිපති දෙපාර්තමේන්තුවේ ඉහළ නිලයන් දරන ඇතැම් අය අගමැතිවරයාට ඕනෙ විදියට නීතිය නමන බවයි පෙනෙන්නේ. මේ අය නාමිකව රට හමුවේ හෙළිදරව් කළ යුතුයි. ඔවුන් පක්‍ෂපාතීව කටයුතු කරන ආකාරය රටටම දැන ගන්නට සැලැස්විය යුතුයි.” පක්‍ෂ නායකයෝ කිහිපදෙනෙක්ම පෙන්වා දුන්හ.
එසේම ෆෙඩරල් ව්‍යවස්ථාව ගෙන ඒම, එට්කා ගිවිසුම අත්සන් කිරීම, ජාතික සම්පත් විකුණා දැමීම ඇතුළු මේ ආණ්ඩුවේ ව්‍යසනකාරී පියවරවලට එරෙහිව දැවැන්ත විරෝධතා ව්‍යාපාරයක් රට පුරා ඇරඹිය යුතු බවට ද මේ පිරිස ඒකමතිකව තීරණය කළහ.

ඔබගේ අදහස්

Your email address will not be published. Required fields are marked *