සාමන්‍ය ජනතාව ඉලක්ක කොට සිදුකල පිපිරීම් මාළාව දැඩිව හෙළා දකිමු !

තිස් වසක් රටේ ජනතාව බියට පත්කළ ම්ලේච්ඡ LTTE ත්‍රස්තවාදය අවසන් කොට ගෙවුණු පසුගිය වසර 10 තුල මෙවැනි වාතාවරණයක් ඇති නොවුණු අතර ජාතික ආරක්ෂාව සම්බන්ධයෙන් රජයේ ඇති උනන්දුව ක්‍රමයෙන් අඩුවීම මෙයට හේතුවයි. මෙවැනි වාතාවරණයක් ඇතිවීම අතිශය කණගාටුදායකය. මෙවැනි සැළසුම් සහගත බෝම්බ පිපිරීම් පිළිබද කලින් තොරතුරු ලබාගත හැකිව තිබු රාජ්‍ය බුද්ධිඅංශ සාමාජිකයින් සිරගත කොට එම බුද්ධිඅංශ අඩපන කළ ආණ්ඩුව මේ විනාශයට සම්පුර්ණයෙන්ම වගකිව යුතුය. තවද මේ මොහොතේ රටේ ජනතාවගේ ආරක්ෂාව සැලසීම ආණ්ඩුවේ පුර්ණ වගකීම වන බව සිහිපත් කර සිටින අතර මෙම අපරාධ වලට සම්බන්ධ ත්‍රස්තවාදීන් හෝ කවරකු වුවද වහාම නිතිය හමුවට ගෙන ඒමට ආණ්ඩුව ක්‍රියා කලයුතු බව අවධාරණය කරමි. එසේම ජාතික ආරක්ෂාවේ ඇති වැදගත්කම අවබෝධ කර ගැනීමට මෙම තත්වය හෝ අවස්ථාවක් කරගනු ඇතැයි විශ්වාස කරමි.

මෙම මිලේච්ඡ සහ බියගුළු ප්‍රහාර මාලාව දැඩි පිළිකුලෙන් යුතුව හෙලාදකින අතර ප්‍රහාරයන්ගෙන් මියගිය අය පිළිබද අපගේ සංවේගය පලකරමින් තුවාල ලැබූවන්ට ඉක්මන් සුවය ප්‍රාර්ථනා කරමි. තවද සියලු ජනතාව ඉවසීමෙන් යුතුව මේ අවස්ථාවේ ක්‍රියාකරන ලෙස ඉල්ලා සිටින අතර ජාතියක් ලෙස කිසිදු භේදයකින් තොරව එක්ව කටයුතුකර මේ ප්‍රහාරයේ සුල මුල සොයා ඊට බලපෑ හේතූන් මුලිනුපුටා දැමීමට එක්වන ලෙසට සියලු පාර්ශවයන්ට ආරාධනය කර සිටිමි.

විමල් වීරවංශ(පා.ම)
නායක,
ජාතික නිදහස් පෙරමුණ,
2019.04.21